「我要讀書 I Need Good Grades」

(以下內容僅供參考，一切以相關部門的更新資料為準。)

無論你係想輕輕鬆鬆碌過，定係想做學霸，更上一層樓，接下落嚟介紹嘅部門或者佢哋提供嘅服務都可以幫到你!

學業指導 Academic Advisor

簡單嚟講，每個同學都會有一個自己學系安排嘅Academic Advisor，佢會係你個學系嘅教研人員，由你入學跟到你畢業為止。有關揀科、升學進修、同主修科相關嘅職場現況都可以問佢，另外亦都可以傾吓其他校園生活嘅嘢，佢可能會為你提供更多資料，俾多啲思考方向你，甚或乎用個人經歷去幫你指點迷津。大學建議每年最少都約見你嘅Advisor一次。唔知道邊個先係你Advisor嘅話，登入返eStudent嘅My Advisor就可以見到佢嘅資料。如果對Academic Advisor嘅安排有任何問題，可以直接向所屬學系嘅辦事處查詢。

包玉剛圖書館 (Pao Yue-Kong Library)

坐擁超過五百萬冊收藏嘅圖書館為全校師生提供高質學術資源，無論係做功課或者做研究，圖書館都總會有適合嘅收藏幫助你完成目標。

樓高七層(地下至六樓)嘅圖書館仲有好多嘅空間預留俾同學讀書同傾project，無論係地下嘅24小時溫習空間，或者係其他樓層嘅小組討論室、個人學習空間同埋多媒體專區都非常適合同學探索學術世界。

圖書館仲會不時搞好多活動鼓勵你多啲睇書，仲有免費工作坊教你點樣好好利用圖書館嘅IT資源提升你做學術研究嘅技巧。

PolyU仲設有三個學習中心，分別係中國語文教學中心(Chinese Language Center, CLC)、英語教學中心(English Language Center, ELC)、數學學習支援中心(Mathematics Learning Support Center, MLSC)，專門幫助同學提升中文、英文同數學能力。

中國語文教學中心 (Chinese Language Center, CLC)

中國語文教學中心主要開辦每個同學都要讀嘅中文堂。如果同學唔清楚點樣滿足CAR科入面中文閱讀/中文寫作(CR/CW)嘅論文寫作要求，可以去CLC網頁(中文自學室 > 中文閱讀與寫作 (CR/CW))了解更多，甚至預約指導服務，嗰到嘅老師會教你點提升睇學術資料同寫學術文評嘅能力。

英語教學中心 (English Language Center, ELC)

如果同學想提升自己嘅英文水平，就記住去搵ELC啦! ELC提供唔同形式嘅課堂俾同學加強自己嘅英文能力，其中Excel@English Scheme (EES)會幫你配對一位英文老師，無論你想提升邊一方面嘅能力，佢都可以幫到你。

而喺A305室嘅Centre for Independent Language Learning (CILL)仲可以俾你喺一個輕鬆嘅環境學英文，網頁上面仲有好多有用嘅資源等緊你，無論你要做註釋、寫求職信、考IELTS都可以幫到你。

數學學習支援中心 (Mathematics Learning Support Center, MLSC)

除非你係人文學科嘅同學，基本上所有大學生都需要最少讀一至兩科數學或統計學，但唔洗驚嘅! 只要你讀緊有關科目，你就可以去MLSC到預約個時間，就會有老師教到你識為止。

最後更新日期: 28/07/2023