「我全都要 I Need U-Life」

(以下內容僅供參考，一切以相關部門的更新資料為準。)

海外交流 Exchange

大學五件事其中一件就係Exchange，去外國留學一個學期或者一年，感受外國文化擴闊視野。PolyU已經為同學準備海量海外交流機會，中國內地事務處(MDO)負責大灣區嘅交流，而國際事務處(GEO)就處理世界各地嘅交流，睇下自己心儀嘅國家城市，盡早計劃同考慮時間錢銀等問題，去到嘅機會都大啲。

短期海外學習活動 Study Tour

唔係每個同學都安排到成個學期嘅Exchange，所以大家可以考慮吓短期嘅Study Tour。聖誕新年嗰時跟MDO去大灣區，暑假時經GEO網頁搵想去嘅外國大學報Summer School。你哋無論參加去邊到嘅Study Tour都好，經濟負擔都唔會太大，因為參加去中國遊學團嘅價錢係好合理，即使去外國都可以申請資助。同學都可以參加自己學系舉辦嘅海外考察活動，同樣都可以申請資助㗎。除咗以上呢啲Study Tour，同學仲可以利用海外WIE、Ser-Learn等等機會去外國體驗唔同嘅生活。去外國嘅機會多到數唔完，主動爭取就得㗎喇~

身心健康活動 Wellness Enhancement

雖然SYA同學讀書真係好忙，但身體健康都好重要，所以得閒就要搵朋友做Gym、打波、游水，做多啲運動，人都開心啲健康啲。Book場首先要上網或VA地下體育館入錢落自己戶口到，然後就上去POSS(Facility Booking)預約時間就得。PolyU仲有晨早優惠，想唔洗錢做運動就要早起身啦!

SAO CWS會不定期舉辦活動俾同學參加(留意電郵)，呢個計劃曾經同Nike合辦Training Club，成班人係VA一齊做瑜伽。做運動最好當然係成為習慣，但係點樣做先最適合自己? 同學可以上POSS(Facility Booking > Wellness Consultation)預約專業教練做個測試，無論你想鍛鍊心肺功能、減肥、鍛鍊完美體型，佢都可以幫你準備訓練計劃，跟住做就得。

心底潛藏一股想關心人嘅熱誠? 成為Wellness Ally嘅一分子就可以充分發揮你嘅熱血，喺PolyU入面宣揚身心靈健康。仲會免費請你上心理健康急救課程，幫到人又幫到自己!

EXCELL (Extra-Curricular Enrichment for Lifelong Learners)

雖然佢個名好長，但簡單啲來講就係課外興趣班，等同學可以喺無壓力嘅環境之下學習更多嘅技能同知識，無論係實用技能、生涯規劃、語言、社會、身心靈健康都可以喺EXCELL學到，擴闊自己眼界，而每班只係需要50蚊。同學只需要上POSS報名同交學費就可以上堂。想知有咩可以揀可以上EXCELL網頁睇睇。

Art Pal

由文化及設施推廣處(CPEO)舉辦嘅Art Pal同同EXCELL有啲相似，活動包括書法、繪畫、舞蹈、戲劇、音樂、傳統文化，希望參加嘅同學可以發掘文化藝術有趣驚艷之處。同學只需要上CPEO嘅網頁睇吓有邊班有興趣，報名之後交學費同埋材料費就可以上堂。佢地仲會不定期為PolyU同學舉辦電影會或者舞台表演、講座等等，記得留意電郵喇。

最後更新日期: 28/07/2023